Sa die de sa Sardigna est sa festa de su popùlu sardu e amentat sa Sarda Rivolutzione, una casione longa de gherras pro sa zustissia e contra de sas prepotentzias de sos meres de tando: sos piemontesos. Su populu sardu e casteddarju su 28 de Aprile de su 1794, a pustis de prus de deghe annos de batallas, iscatzabat sos piemontesos e su vicerè Balbiano dae s’isola nostra ca custos non cheriant tzèdere a sos sardos perunu potere in terra issoro.
Custa festa, custa die e s’istoria nostra diant depere essere tentas in contu meda dae sas iscolas e dae sas istitutziones provintziales, regionales e comunales ma gai no est, o pagu cosa si faghet. E tando cheret chi l’amentemus nessi nois Sa Sarda Rivolutzione pro chi potzat sinzare s’andala de unu cambiamentu pro sas comunidades de Sardigna.
Oje e sempere tocat de amentare chi su populu nostru, comente a totus sos populos de su mundu, tenet diritu de si gubernare e de seperare sa menzus manera de fagher sotziedade e una comunidade acollidore, cun su rispetu pro cada pessone e pro cada idea.
Est semper tempus pros sa Sarda Rivolutzione, est semper tempus de tribulare… ca su bentu lu pèsant sas ideas nostras de sardas e de sardos liberos. Sardos chi non timent a chistionare sa limba issoro, chi ponent a frutu sa cultura e sa traditzione sarda pro amaniare unu tempus benidore de libertade e prosperidade, chi godint de sa vida in cust’isula de rara bellesa cunfrontandesi cun totu su mundu e chi cussa bellesa cherent chistire e afforticare, chi gherrant pro chi sa zente in custas terras (comente in cada logu) non siat prus posta suta su calcanzu de opressores e de perunu potere prepotente, istranzu o sardu chi siet.
Oje comente a eris su gubernu continentale cheret dezidere in conca de sos sardos supra medas temas: cheret detzidere in logu nostru ube ponnere, a favore de sas multinatzionales, impiantos de energia (fintzas in sas terras prus bonas pro su trabballu de massajos e pastores), ube ponnere mancari iscorias e arga, ite faghere de sas terras e de sa zente sarda e de custa Sardigna chi pro medas prepotentes abarrat essere una colonia ube bennere in s’istiu a s’infundere in mare.
A foras dae cada idea de subordinatzione e auto-subordinatzione e de cada casta de clientelismu pedidore tocat a nois a narrere e fagher cumprendere, batallande cada die pro s’autodeterminatzione, chi sa Sardigna est una terra populada de zente chi cheret picare in manos su destinu suo. Pro sa Sarda Rivolutzione, oje che a eris, tocat de tenner dignidade e de fagher Comunidade e Comunidades Resistentes.
Bona Die de Sa Sardigna e bona Rivolutzione a totus!
Su Movimentu de Comunidade
Clicca in basso a destra per iscriverti al blog e riceverai i contenuti pubblicati direttamente sulla tua mail
comunidadegavoi.org 