Sa Die de sa Sardigna est sa festa de su pòpulu sardu e ammentat sa Sarda Rivolutzione, una casione longa de gherras pro sa zustìssia e contra de sas prepotèntzias de sos meres de tando: sos piemontesos.
Su pòpulu sardu e casteddarju su 28 de Aprile de su 1794, a pustis de prus de deghe annos de batallas, iscatzabat sos piemontesos e su vicerè Balbiano dae s’ìsula nostra ca custos non cheriant tzèdere a sos sardos perunu potere in terra issoro.
Custa festa, custa Die e s’istòria nostra diant dèpere èssere tentas in contu meda dae sas iscolas e dae sas istitutziones. E diat deper èssere tentu in contu, in sa polìtica de cada die, mescamente su sensu de custa pesada de sos sardos. Ca su pòberu agartzadu dae sas prepotèntzias in cada tempus podet artiare sa conca.
E tando cheret chi ammentemus Sa Sarda Rivolutzione pro chi potzat sinzare s’àndala de unu cambiamentu pro sas comunidades de Sardigna.
Su pòpulu nostru, comente a totus sos pòpulos de su mundu, tenet diritu de si guvernare e de seperare sa menzus manera de fagher sotziedade e una comunidade acollidore, cun su rispetu pro cada pessone e pro cada idea.
Est semper tempus pro sa Sarda Rivolutzione, est semper tempus de tribulare.
Ca su bentu lu pesant sas ideas nostras de sardas e de sardos lìberos.
Sardos chi non timent a chistionare sa limba issoro, chi ponent a frutu sa cultura sarda pro ammaniare unu tempus benidore de libertade e prosperidade, chi godint de sa vida in cust’ìsula de rara bellesa cunfrontandesi cun totu su mundu e chi cussa bellesa cherent chistire e aforticare, chi gherrant pro chi sa zente in custas terras (comente in cada logu) non siat prus posta suta su calcanzu de opressores e de perunu potere prepotente, istranzu o sardu chi siet.
Oje comente a eris su guvernu continentale, cun sos tzeracos sardos suos, cheret detzidere in conca nostra supra medas chistiones: cheret detzìdere in logu nostru ube pònnere, a favore de sas multinatzionales, impiantos de energia (fintzas in sas terras prus bonas) ube pònnere iscòrias e arga, ite fàghere de sas terras e de sa zente sarda e de custa Sardigna chi pro medas prepotentes abarrat una colònia ube bènnere in s’istiu a s’infundere in mare e ube, comente in custas dies, isperimentare bombas, armas e “trupas de masellu de addestrare”.
E tando comente in Pratobello sa Sardigna si depet pesare e abochinare: A Foras! Ca cherimus essere terra de paghe, de salude, de bida e non de maladias e morte! E nemos nos podet collunare cun promitas frassas de benefìtzios econòmicos chi diant deper bènnere da una ocupatzione militare prepotente e iscandulosa.
Comente iscandulosos sunis su presidente e sos capos mannos de sa Regione chi ant a andare a protzessu pro nòminas e incàrrigos, apaltos, piagheres e piaghereddos a sos cumpanzos issoro.
E tando A Foras dae cada idea de subarternidade e auto-subordinatzione e dae cada casta de clientelismu feudale e pedidore, chi at fatu e faghet sistema, tocat a nois a nàrrere e fagher cumprendere, batallande cada die pro s’autodeterminatzione, chi sa Sardigna est una terra populada de zente chi cheret picare in manos su destinu suo.
Pro sa Sarda Rivolutzione, oje che a eris, tocat de non bèndere unu pramu de sa terra e de sa libertade nostra, de tenner dignidade e de fagher Comunidade e Comunidades Resistentes.
Bona Die de Sa Sardigna, bona Festa de sos Sardos e bona Rivolutzione a totus!
Su movimentu Comunidade
comunidadegavoi.org 