Su 25 de Aprile sinzat sa Liberatzione dae su nazifascismu e su comintzu de su protzessu democraticu in Italia.
Sighimus sa lota pro dimandare cussentzia antifascista, libertade, diritos e autodeterminatzione in totu su mundu sighinde a non tancare sos ocros a innantis de su genocidiu de su populu de sa Palestina, chi sighit a aguantare dae 70annos sa barbarie de Israele e de s’imperialismu. Comunidade at a essere semper contra a su sionismu fascista e paris a sa resistentzia laica e progressista palestinesa. Sa propria cosa non si podet narrere de medas ateras fortzas chi si diant cherrer mutire democaticas, de manca e progressistas chi tenent positziones frassas supra sa gherra e chi supra s’autodeterminatzione, su colonialismu e s’isfrutamentu de sa Sardigna pro interessos italianos e anzenos non bocant mancu mutu. Sunt dispostos a esser solidales cun cada populu de cada ispreundu de mundu ma sa Sardigna pro custa zente depet arrumbare logu de isfrutamentu, ispeculatzione energetica e edilitzia, de occupatzione militare e de “trupas de masellu de addestrare”.
In sa die de sa Resisténzia e Liberatzione tando cherimus amentare chi sos valores antifascistas depent andare paris a sas batallas contra s’economia de gherra chi si cheret ponner in atu e de cada ocupatzione coloniale. Su dinare cheret postu in salude, istrutzione e pro bardiare s’ambiente e sas risorsas comunas in su rispetu de chie in sos logos campat, traballat, resistet e cheret frorire.
Su populu sardu e totu sos populos custrintos tenent diritu a pesare conca e liberare sa terra issoro dae sos prepotentes coloniales e si no arresonamus supra de custu argumentu in custa die semus festande una Liberatzione e una Resistentzia de plastica e chi non podet produire una manera noba e libera de abarrare in d’unu mundu chi tenzat rispetu pro totu sos mundos.
Bona die de Resisténtzia e bona Comunidade a totus.
Il Movimento Comunidade
comunidadegavoi.org 