Oje est su 28 de abrile, oje est Sa Die de sa Sardigna, sa festa manna de su pòpulu sardu.
Oje s’ammentat Sa Rivolutzione Sarda de su 1794, comintzada annos prima in totu s’isola (sighida e chi tocat de sighire), e sa die chi dae Casteddu su pòpulu reberde, gherrande pro sos diritos, sa dignidade, s’auto determinatzione e sa libertade de sos sardos e de sas sardas, iscatzabat su Vicerè e sos piemontesos.
Oje in bidda su Sindigu at cunvocadu unu cussizu comunale pro discutere su Rendiconto Finantziàriu, sas Tarifas de sa TARI e pro numenare su Revisore.
Oje pro sa prima borta in chimbe annos su grupu de Opositzione de Comunidade non at a essere presente in sa sala de su cussizu.
Si su Sìndigu, sighinde su regulamentu de su cussizu comunale, aviat cunvocadu una Cunferentzia de sos capos de sos grupos polìticos de su cussizu, in cussa sede, aviamus manifestadu s’idea nostra de faghere àteras cosas in sa die de sa festa natzionale sarda e de faghere su cussizu in àtera die e in àteru oràriu discansosu pro totus. Sos atos de su Rendiconto, difatis, furint ammaniados in tempus e custu cussizu si podiat faghere fintzas sa chida colada o in atera die intro su 30 de abrile.
Sa cunferentzia serbit pròpiu pro sestare in sa menzus manera sos cussizos comunales, garantinde sa màssima partetzipatzione de totu sos cussizeris. Cun ispiritu de collaboratzione in Cunferentzia si diant depere seberare dies e oràrios adatos a sos bisonzos de totus, seberare temas e chistiones. Su cussizu, difatis, non est solu de sa majoria chi at bintu sas eletziones ma de totus sos chi sunt rapresentados e est e abarrat su logu polìticu prus de importu pro sa bidda.
In chimbe annos non ant mai cunvocadu sa Cunferentzia fintzas si su grupu nostru at presentadu deghenas de bortas custa netzessidade e oportunidade de sighire su Regulamentu e faghere custos atòbios. In custa comente in medas àteras cosas non semus istados ascurtados.
Non semus mai mancados a unu cussizu e amus a sighire su traballu polìticu nostru fintzas a su 2026 e a sos annos chi ant a bennere. Fumis totus presentes in Comune fintzas sa die chi su restu de sos collegas furint assentes e est mancadu su nùmeru legale pro pòdere comintzare sos traballos, cosa mai capitada in bidda.
No amus mai mancadu de istudiare sas cosas e de faghere intendere sa idea nostra, de preguntare informatziones a sos ufìtzios, arresonande e chircande de currezere, de mezorare s’atzione polìtica e amministrativa pro sa bidda e pro sa comunidade .
Oje sa boghe nostra at a mancare in sa sala de su cussizu ca cherimus marcare, in custa die de Festa pro su pòpulu sardu, chi esistet un’àtera manera de faghere polìtica e partetzipatzione, un’àtera manera de pensare supra de s’istòria, sa cultura, sa limba, sa libertade e s’auto determinatzione de sa Sardigna.
In custa die, comente faghiant sas amministratziones de sos annos colados (e non solu cussa de Comunidade) tocabat de faghere atòbios culturales supra Sa Die de Sa Sardigna e supra de Sa Rivolutzione Sarda pro aberrere cun pensamentu crìticu unu cunfrontu cun mannos e minores.
Cale Sardigna cherimus fraigare pro su benidore? Cale libertade podimus tennere si non connoschimus s’istòria e si non ponimus capu a sas dies nòdias pro su pòpulu nostru?
Custa Sardigna si depet istazare dae su pensamentu uniformadu e pro cussu netzèssitat de una rivolutzione nova contra sos meres coloniales, contra una frassa informatzione italianista, contra a chie nos cheret ammudare in sa cultura e in sa limba nostra, contra sos ispeculadores, contra sos chi cherent gherra e contra sas bases militares, contra su clientelismu feudale chi est galu inchesu in cust’isola.
Oje nois amus a festare Sa Die de Sa Sardigna cun sa zente, cun Comunidade e cun totu sas sardas e sos sardos chi batallant cada die pro una Sardigna prus zusta e lìbera.
Sos cussizeris de Opositzione de Comunidade
Su quadru est de Enrico Ibba
comunidadegavoi.org 